Gəncədə sahibsiz heyvanların zəhərləndiyi ilə bağlı iddialar səsləndirilib.
Gencexeber.az-a "Kərpic zavodu" adlanan yaşayış massivinin sakinləri tərəfindən daxil olan çoxsaylı müraciətlərdə bildirilib ki, son günlər küçə heyvanlarının kütləvi şəkildə zəhərlənməsi halları müşahidə olunur.
Məlumata görə, naməlum şəxs və ya şəxslər tərəfindən ərazidə sahibsiz dolaşan 3 it və 1 pişik zəhərlənib. Sakinlərin sözlərinə görə, heyvanlarda zəhərlənməyə işarə edən əlamətlər – xüsusilə ağız və burun nahiyəsində köpüklənmə müşahidə olunub. Bu isə onların zəhərli maddə qəbul etməsi ehtimalını artırır.
Sakinlər məsələ ilə bağlı narahatlıq ifadə edərək aidiyyəti qurumların hadisəni araşdırmasını tələb edirlər.
