Gəncədə bu gün səhər saatlarından sahibsiz itlərin toplanması şəhər sakinləri ilə heyvansevərləri qarşı-qarşıya gətirib.
Gencexeber.az-ın məlumatına görə, bu gün — martın 11-i səhər saatlarından etibarən Mənzil-Kommunal Təsərrüfatı İstehsalat Birliyinin (MKTİB) nümayəndəsinin iştirakı ilə IDEA Heyvanlara Qayğı Mərkəzinin əməkdaşları tərəfindən sahibsiz heyvanların toplanmasına başlanılıb. Bunun üçün əraziyə xüsusi avtomobil və işçi qüvvəsi cəlb olunub.
Bildirilib ki, sözügedən tədbirlər şəhərdə sahibsiz itlərin sayının nəzarətsiz artması, eləcə də son dövrlərdə it dişləməsi hallarının kəskin çoxalması ilə əlaqədardır.
Ərazidə dördayaqlıların toplanması zamanı heyvansevərlərlə bu addımı dəstəkləyən şəhər sakinləri arasında gərginlik yaşanıb, mübahisə yüksək ton və emosional çıxışlarla müşayiət olunub.
Heyvansevərlər toplanan itlərin sonrakı taleyinin necə olacağı ilə bağlı narahatlıqlarını dilə gətiriblər. Onlar sahibsiz heyvanların hüquqlarına hörmətlə yanaşılmasını, prosesin şəffaf aparılmasını tələb ediblər. Digər tərəf isə, baş verən təhlükəli hadisələri əsas gətirərək, bu tədbirlərin vacib olduğunu vurğulayıb.
Qeyd edək ki, problemin həlli məqsədilə 2023-cü ildə Gəncədə yaradılan "Yuva" heyvan sığınacağında sahibsiz itlərin peyvənd olunması və saxlanılması nəzərdə tutulurdu. Lakin ötən ilin yanvar ayında maddi çatışmazlıqlar səbəbindən sığınacağın fəaliyyəti dayandırılıb.
Rəsmi məlumatlara əsasən, Gəncədə son iki ay ərzində 380 nəfər sahibsiz itlər tərəfindən dişlənib.
