Gəncədə sahibsiz itlərin sayının artması sakinlərin ciddi narahatlığına səbəb olur. Şəhərin müxtəlif ərazilərində – parklar, küçələr və yaşayış binalarının qarşısında dolaşan dördayaqlılar artıq bəzi vətəndaşların qorxulu röyasına çevrilib.
Gencexeber.az-a şikayət edən gəncəlilər sahibsiz itlərin sayının getdikcə artdığını və bunun şəhər sakinləri üçün ciddi problem yaratdığını deyirlər.
Şikayətçilərin sözlərinə görə, problemin həlli üçün 2023-cü ildə yaradılan "Yuva" heyvan sığınacağında itlərin peyvənd olunması və saxlanılması nəzərdə tutulurdu. Lakin ötən ilin yanvar ayında maddi çatışmazlıqlar səbəbindən sığınacaq fəaliyyətini dayandırıb.
Gəncə Şəhər İcra Hakimiyyətindən redaksiyamıza bildirilib ki, küçə itləri ilə bağlı ildə iki dəfə Azərbaycan Dövlət Aqrar Universitetinin (ADAU) Baytarlıq fakültəsi tərəfindən aksiya keçirilir. ADAU ilə yanaşı, Avropanın aparıcı universitetlərinin bu sahə üzrə ixtisaslaşmış mütəxəssislərinin iştirakı ilə sahibsiz küçə itlərinin qısırlaşdırılması baş tutr. Hər bir aksiya zamanı orta hesabla 200-dən çox sahibsiz it prosesə cəlb olunur.
Qeyd edək ki, rəsmi məlumatlara görə, Gəncədə son iki ay ərzində 380 nəfəri sahibsiz it dişləyib.
