Gəncədə dünən axşam saatlarında baş verən yanğın səbəbindən şəhərin bir hissəsində qaz təchizatında yaranan fasilə aradan qaldırılır.
Gencexeber.az-ın məlumatına görə, hadisə Gəncə–Bakı magistral yolunun tunel hissəsində yerləşən 215 mm diametrli orta təzyiqli qaz xəttində baş verib. Yaxınlıqdan keçən irihəcmli elektrik xəttində yaranan qısaqapanma nəticəsində yanğın baş verib və qaz xətti zədələnib.
Nəticədə Gəncə şəhərində təxminən 35–40 min abonentin qaz təminatında fasilə yaranıb.
Gəncə Regional Qaz İstismar İdarəsinin Gəncə Xidmət Sahəsinin rəis müavini Samin Hacıyev bildirib ki, əməkdaşlar və xüsusi texnikalar hadisə yerinə cəlb olunub.
Onun sözlərinə görə, hazırda ərazidə təxirəsalınmaz təmir-bərpa işləri davam etdirilir:
"Yanğın hadisəsinin baş verməsi buradan keçən irihəcmli elektrik xəttində yaranan qısaqapanma nəticəsində meydana gəlib. Nəticədə qaz xətti zədələnib və ani alışma baş verib. Əməkdaşlarımız və mütəxəssislər ərazidə təmir işləri görürlər."
Samin Hacıyev qeyd edib ki, günorta saatlarında işlərin yekunlaşdırılması və qaz təchizatının bərpası gözlənilir.
Qurum rəsmisi yaranmış narahatlığa görə abonentlərdən anlayış göstərmələrini xahiş edib.
