Gəncə sakinləri şəhərdaxili marşrut avtobuslarının son dayanacaqlarda və bəzi küçələrdə qaydalara zidd formada saxlanmasından narazıdırlar.
Gencexeber.az-a son günlər sakinlər tərəfindən daxil olan çoxsaylı şikayətlərdə bildirilir ki, bəzi sürücülər avtobusları pavilyonlardan, yəni sərnişinlərin enib-minməsi üçün nəzərdə tutulmuş dayanacaqlardan xeyli aralı saxlayır. Nəqliyyat vasitələri yolun hərəkət hissəsində, bəzən isə tam ortasında dayandırılır. Bu hal isə həm digər sürücülərə, həm də piyadalara təhlükə yaradır.
"Mümkün olmaz ki, sürücülər maşınları yolun ortasında saxlamasınlar, səkiyə yaxın bir yerdə park etsinlər?" – sakin şikayət edib.
Şikayətçilər qeyd edirlər ki, bu vəziyyət xüsusilə pik saatlarda nəqliyyatın axınını pozur, bəzi hallarda isə qəza riskini artırır. Onların fikrincə, Gəncə şəhərində yeni marşrut xətlərinin fəaliyyətə başlaması ilə nəqliyyat infrastrukturunda müsbət dəyişikliklər olsa da, dayanma və parketmə qaydalarına nəzarət demək olar ki, yoxdur.
Sakinlər məsələ ilə bağlı Gəncə Şəhər İcra Hakimiyyəti ilə yanaşı aidiyyəti qurumlardan, eləcə də sərnişindaşıma şirkətərindən vəziyyətə nəzarətin gücləndirilməsini, qaydaları pozan sürücülərə qarşı tədbir görülməsini tələb edirlər.
