Gəncə Şəhər Psixiatriya Xəstəxanasına yeni baş həkim təyin olunub.
Gencexeber.az-ın məlumatına görə, səhiyyə nazirinin müvafiq əmri ilə sözügedən tibb müəssisəsinin baş həkimi vəzifəsi Zeynal Məmmədova tapşırılıb.
O, bundan əvvəl Maştağa Psixiatriya Xəstəxanasında həkim kimi fəaliyyət göstərib.
Qeyd edək ki, son aylarda bu vəzifə üzrə tez-tez dəyişikliklər müşahidə olunur. Belə ki, ötən ilin dekabr ayında xəstəxanaya Yaqut İlyasova baş həkim təyin edilib, yanvar ayında isə həkim-psixiatr Sultanə Salmanova baş həkim vəzifəsini müvəqqəti icra edib.
Bununla da, son 4 ay ərzində Gəncə Şəhər Psixiatriya Xəstəxanasına artıq üçüncü rəhbər təyin olunur.
