Xəbər verdiyimiz kimi, Gəncə şəhərində beşmərtəbəli yaşayış binalarından birində mənzildə partlayış baş verib. Hadisə binanın sonuncu mərtəbəsində yerləşən, Zarina Nağıyevaya məxsus mənzildə qeydə alınıb.
Gencexeber.az-ın məlumatına görə, partlayış nəticəsində xəsarət alan Elnur Qurbanov gecə saatlarında ağır vəziyyətdə Bakıda tibb ocaqlarının birinə transfer edilib. Hazırda onun müalicəsi paytaxtda davam etdirilir.
Məlumata əsasən, E.Qurbanov həmin evdə usta kimi çalışıb. İlkin ehtimallara görə, hadisə ustanın dəlikləri dolduraraq hamar səth yaratmaq üçün istifadə etdiyi nitrosellüloza əsaslı dolğunun alışıb partlaması nəticəsində baş verib.
Qeyd edək ki, mebellərdə, parket və müxtəlif taxta materialların səthində tətbiq olunan həmin dolğunun alovlanma nöqtəsi cəmi +21º dərəcədir.
Faktla bağlı araşdırma aparılır.
