Gəncədə ötən ilin 18 oktyabrında İsaq Cəfərov küçəsində yerləşən beşmərtəbəli yaşayış binasında baş verən partlayışdan zərər çəkən sakinlər üçün ayrılan kirayə haqlarının ödənişi iki aydır dayandırılıb. Sakinlər bildirirlər ki, müvəqqəti kirayə tutduqları mənzillərin ödənişini özləri qarşılamağa məcbur qalıblar.
Məsələ ilə bağlı Gencexeber.az Gəncə Şəhər İcra Hakimiyyətinə sorğu ünvanlayıb. Qurumdan verilən rəsmi cavabda qeyd edilib ki, sakinlər üçün nəzərdə tutulan kirayə haqları icra hakimiyyəti tərəfindən bir il müddətində tam şəkildə ödənilib:
"Kirayə haqlarının ödənilməsi üçün Gəncə Şəhər İcra Hakimiyyətinə ayrılan məbləğ 1 il üçün nəzərdə tutulub və həmin vəsait tam şəkildə ödənilib".
Əlavə edilib ki, hadisə nəticəsində zərər çəkmiş binada təmir-bərpa işlərinin aparılması Fövqəladə Hallar Nazirliyinə (FHN) tapşırılıb.
Nazirlikdən redaksiyamıza bildirilib ki, təmir-bərpa işləri partlayışın baş verdiyi blokda yerləşən mənzillərdə aparılıb və artıq tamamlanıb: "Bina qazla təmin edildikdən sonra sakinlərin tam şəkildə geri köçürülməsi həyata keçiriləcək".
