Gəncədə yol problemi sakinlərin gündəlik həyatını çətinləşdirməkdə davam edir.
Gencexeber.az məlumat verir ki, söhbət şəhərin "2705" dairəsindən Gəc zavoduna aparan yolun sol tərəfində yerləşən yeni yaşayış massivindəki Qurban Abbasov küçəsindən gedir.
Küçədə indiyədək asfalt örtüyü salınmayıb. Nəticədə orada saysız-hesabsız dərin çuxurlar əmələ gəlib və küçə faktiki olaraq keçilməz vəziyyətə düşüb.
Sakinlərin sözlərinə görə, yağışlı havalarda vəziyyət daha da ağırlaşır. Yolun bərbad olması səbəbindən artıq bəzi taksi sürücüləri çağırış ünvanına gəlməkdən imtina edir. Şəxsi avtomobillərlə hərəkət edənlər isə hər gün nəqliyyat vasitələrinin zədələnməsi riski ilə üz-üzə qalırlar.
Vətəndaşlar bildirirlər ki, avtomobillər burada hərəkət etməkdən çox, maneələri aşaraq "dırmaşmalı" olurlar.
Qurban Abbasov küçəsində yaşayanlar aidiyyəti qurumlardan asfaltlanma işlərinin görülməsi xahiş edirlər.
