Gəncə şəhərində yerləşən Nizami kinoteatrının qarşısındakı parkın işıqlandırma sistemi işləmir.
Gencexeber.az-a daxil olan şikayətlərə görə, sözügedən ərazidə ötən ilin sonlarında şəhərdə aparılan quruculuq və abadlıq işləri çərçivəsində əsaslı təmir işləri həyata keçirilib. Parkın yol örtüyü yenilənib, yeni oturacaqlar quraşdırılıb, əraziyə güllər və ağaclar əkilib.
Lakin sakinlərin sözlərinə görə, parkda işıq lampaları quraşdırılsa da, bu günədək onlar işə salınmayıb. Qaranlıq səbəbindən axşamlar parkda gəzmək mümkün olmur. Ərazidə yaşayan sakinlər və parka gələn insanlar məsələ ilə bağlı narahatlıq ifadə edirlər.
Şikayətçilər hesab edirlər ki, aidiyyəti qurumlar parkda quraşdırılmış işıqlandırma sisteminin istifadəyə verilməsinə və nəzarətinə ciddi yanaşmalıdırlar. Sakinlər problemin qısa zamanda aradan qaldırılmasını istəyirlər.
