Bu gün görkəmli bəstəkar, dirijor, Azərbaycan Respublikasının Xalq artisti Nəriman Əzimovun anadan olmasının 90 ili tamam olur.
Gencexeber.az məlumat verir ki, yubiley münasibətilə Xalq artisti Şahnaz Haşımova, Göygöl Dövlət Mahnı və Rəqs Ansamblının bədii rəhbəri, tarzən Sahil Quliyev, Əməkdar artist Eldar Abdullayev, ansamblın əməkdaşları Mehriban Allahverdiyeva, Zəminə Mustafayeva və digər incəsənət xadimləri mərhum bəstəkarın məzarını ziyarət ediblər.
Ziyarət zamanı Nəriman Əzimovun ruhuna dualar oxunub, məzarı önünə tər güllər düzülüb.
Qeyd edək ki, Nəriman Abbasqulu oğlu Əzimov 1 iyun 1936-cı ildə Gəncə şəhərində anadan olub. O, 1955-ci ildə Azərbaycan Dövlət Konservatoriyasının xor dirijorluğu fakültəsinə daxil olub.
Nəriman Əzimovun həyat və yaradıcılığının mühüm hissəsi Azərbaycan Televiziyası və Radiosu ilə bağlıdır. O, burada Xalq çalğı alətləri orkestrində tarzən kimi fəaliyyət göstərib, eyni zamanda xor kollektivinin xormeysteri olub.
Bəstəkar 1974-cü ildən Səid Rüstəmov adına Xalq çalğı alətləri orkestrinin bədii rəhbəri və baş dirijoru vəzifəsində çalışıb. O, AzTV-də səs rejissoru kimi də fəaliyyət göstərib.
Nəriman Əzimov Xalq çalğı alətləri orkestri üçün bir sıra musiqi əsərləri bəstələyib. Onun ən tanınmış əsərlərindən biri "Gəncəm" bəstəsi hesab olunur, ilk ifaçısı isə Xalq artisti Şahnaz Haşımova olub.
Sənətkar 1991-ci ildə Azərbaycanın "Xalq artisti" fəxri adına layiq görülüb, 2003-cü ildə isə professor elmi rütbəsini alıb. O, həmçinin "Şöhrət" ordeni ilə mükafatlandırılıb.
Nəriman Əzimov 19 noyabr 2016-cı ildə 80 yaşında vəfat edib və Gəncənin Səbiskar qəbiristanlığında dəfn olunub.
