Gəncə şəhərində yağan güclü yağışlar küçələrdə palçıq və lilin yaranmasına səbəb olub. Nəticədə nəqliyyat vasitələrindən biri hərəkətsiz qalıb.
Gencexeber.az-ın məlumatına görə, hadisə şəhərin Əlövsət Məmmədov küçəsində, Gəncə Dövlət Universitetinin 5-ci korpusu yaxınlığında qeydə alınıb. Küçənin asfaltlanmamış hissəsində sahibinin evinin qarşısında park edilmiş "Mercedes" markalı aztutumlu mikroavtobus palçıqda batıb.
Məlumata görə, avtomobil sahibi səhər saatlarında maşını işə salıb hərəkət etdirmək istəyib. Lakin nəqliyyat vasitəsi tərpənməyib. Sürücü bir neçə dəfə cəhd etsə də, nəticə əldə edə bilməyib. Avtomobil yalnız digər maşının köməyi ilə palçıqdan çıxarılıb.
Yerli sakinlər bildirirlər ki, bu cür hallar tez-tez baş verir. Onlar aidiyyəti qurumlardan məsələyə təcili müdaxilə edilməsini və yolun bərpasını tələb edirlər.
