Gəncə şəhərində bəzi mağaza və köşklərdə yeniyetmələrə siqaret satışı halları baş verir.
Gencexeber.az-a müraciət edən valideynlər bildiriblər ki, bu cür satışlar uşaqların sağlamlığına ciddi zərər vurmaqla yanaşı, həm də qanunla qadağandır. Onların sözlərinə görə, xüsusilə köşklərdə tək-tək satılan siqaretlər uşaqlar üçün əlçatan olur.
Valideynlər hesab edirlər ki, bu hallar ictimai nəzarətdən yayınır və məsul qurumlar – ticarət obyektlərinin fəaliyyətinə nəzarət edən strukturlar bu istiqamətdə təcili tədbirlər görməlidirlər.
Sözügedən faktı təsdiqləyən görüntülər Yeni Gəncə qəsəbəsində çəkilib. Kadrlarda 13–14 yaş aralığında olan üç yeniyetmənin əllərində çoxsaylı siqaret qutuları tutaraq lovğalandıqları açıq şəkildə görünür.
Məsələ ilə bağlı yerli sakinlər aidiyyəti qurumları qanunsuz satışın qarşısını almağa çağırırlar.
