Xəbər verdiyimiz kimi, Gəncə şəhəri Nadir Hüseynov adına 38 nömrəli tam orta məktəbdə şagirdlərin iştirakı ilə xoşagəlməz hadisə baş verib.
Gencexeber.az-ın məlumatına görə, təhsil müəssisəsinin bir neçə yuxarı sinif şagirdi məktəbin daxilində divardan asılmış şəkilləri yumruqla sındırıb, qapını isə təpik və yumruq zərbələri ilə zədələyib. Yeniyetmələr törətdikləri əməlləri mobil telefonun kamerasına da çəkiblər.
Məsələ ilə bağlı Gencexeber.az-a açıqlama verən Daxili İşlər Nazirliyinin (DİN) Mətbuat Xidmətinin regional qrupunun baş inspektoru Eşqin Qasımov bildirib ki, görüntülərlə bağlı polis əməkdaşları tərəfindən müvafiq tədbirlər həyata keçirilib: "Həmin şagirdlər valideynlərinin iştirakı ilə polis orqanına dəvət olunaraq izahatları alınıb və profilaktiki söhbətlər aparılıb".
Qeyd edək ki, hadisə nəticəsində dövlət əmlakına maddi ziyan dəyib, təhsil ocağının nüfuzuna isə xələl gəlib.
Bununla belə, Gəncə-Daşkəsən Regional Təhsil İdarəsinə ünvanlanan sorğu cavabsız qalıb. Qurum baş vermiş hadisə ilə bağlı mövqeyini açıqlamayıb.
Yeniyetmələrin davranışlarına hansı qiymətin verildiyi, araşdırmanın aparılıb-aparılmaması, eləcə də intizam tədbirlərinin tətbiq olunub-olunmaması barədə məlumat redaksiyamıza təqdim edilməyib. Qurumdan bildirilib ki, "bu mövzu ilə bağlı açıqlama olmayacaq".
