Məlum olduğu kimi, fevralın 27-si Gəncədə gecə saatlarından başlayan güclü külək şəhərin müxtəlif ərazilərində ciddi fəsadlara yol açıb.
Gencexeber.az məlumat verir ki, küləyin təsiri nəticəsində şəhərin Xəlil bəy Xasməmmədov, Dədə Qorqud, Mirzə Abbas Abbaszadə, Üzeyir Hacıbəyov və Müseyib Bağırov küçələrində, eləcə də Heydər Əliyev, Şah İsmayıl Xətai və Nizami Gəncəvi prospektlərində, habelə 4-cü mikrorayon ərazisində ümumilikdə 10-a yaxın yaşayış binasının dam örtüyünə ziyan dəyib. Qışın sərt və soyuq günlərində isə sakinlər çətin vəziyyətlə üzləşiblər.
Növbəti gün İcra nümayəndələri əraziyə baxış keçiriblər, MKTİB-nin işçiləri isə dağıntıları yığışdırıblar. Lakin 20 gündən çox vaxt keçməsinə baxmayaraq, hələ də təmir işləri görülməyib.
Sözügedən vəziyyətlə bağlı Gəncə Şəhər İcra Hakimiyyətindən redaksiyamıza bildirilib ki, göstərilən ünvanlarda yerləşən yaşayış binalarının dam örtüklərinə baxış keçirilib:
"Baxış Gəncə Şəhər İcra Hakimiyyəti yanında Fövqəladə Hallar Komissiyasının təşkilatçılığı ilə, Gəncə Şəhər İcra Hakimiyyəti Mənzil Kommunal Təsərrüfatı İstehsalat Birliyi, Fövqəladə Hallar Nazirliyinin Gəncə Regional Mərkəzinin Fövqəladə Halların Monitorinqi və Proqnozlaşdırılması sektoru, FHN-in Tikintidə Təhlükəsizliyə Nəzarət Dövlət Agentliyi, "Azərdövlətlayihə" DBLİ-nin 5 nömrəli Memarlıq-Planlaşdırma şöbəsi (Gəncə filialı), eləcə də 2 və 3 saylı SİƏD nümayəndələrinin iştirakı ilə aparılıb və müvafiq qaydada aktlaşdırılıb. Aktlar daha sonra aidiyyəti üzrə təqdim olunacaqdır".
