Gəncə şəhərinin iki ərazisində sanitar və kommunal problemlər sakinlərin narazılığına səbəb olub.
Gencexeber.az-a daxil olan şikayətlərə görə, DOS-84 adlanan yaşayış massivində Xəqani küçəsində çoxmənzilli binanın ətrafında sanitar vəziyyət olduqca bərbad vəziyyətdədir. Küçə boyunca axan çirkab suları məişət tullantıları, alaq otları və xəzəllərlə qarışaraq antisanitar mühit yaradıb. Sakinlərin sözlərinə görə, ərazi ilə hərəkət etmək demək olar ki, mümkünsüz hala gəlib.
Rüzigar Qasımov küçəsinin 2-ci döngəsində isə borunun partlaması nəticəsində küçəyə axan su yaşayış evlərinə dolmağa başlayıb. Sakinlər yaranmış vəziyyətin gündəlik həyatlarına ciddi çətinlik yaratdığını bildirirlər.
Vətəndaşlar aidiyyəti qurumlara müraciət edərək mövcud problemlərin operativ şəkildə aradan qaldırılmasını xahiş edirlər.
