Gəncədə kanalizasiya kəmərinin çəkilişi məqsədilə qazılan küçə aylardır bərpa olunmur.
Gencexeber.az-a daxil olan şikayətə əsasən, Şah İsmayıl Xətai prospekti, "27/05 dairəsi" adlanan ərazidə betondan iri kanalizasiya kəmərinin inşası aparılıb. Bu məqsədlə küçə boyunca yol qazılaraq geniş beton konstruksiya yerləşdirilib. Lakin aylardır davam edən işlər hələ də yekunlaşdırılmayıb.
Sakinlərin sözlərinə görə, kanalizasiya xətti çəkilsə də, üstü örtülməyib və yol örtüyü bərpa edilməyib. Nəticədə küçə bərbad vəziyyətə düşüb, hərəkət çətinləşib.
İddialara görə, yeni çəkilən kanalizasiya xəttinə yalnız əraziyə yaxın yerləşən stadionun kanalizasiya sistemi qoşulub. Ətraf evlərin isə köhnə xətdən ayrıldığı, lakin yeni sistemə qoşulmadığı bildirilir. Bu səbəbdən tullantı suları açıq şəkildə qazıntı nəticəsində yaranmış çuxurlara və yeni kəmərin kənarına axıdılır.
Bildirilir ki, həyətlərinə avtomobillə daxil ola bilməyən vətəndaşların darvazaları qarşısında iri, üfunət yayan su gölməçələri əmələ gəlib.
Bundan əlavə, güclü su axını zamanı evlərin subasması halları da müşahidə olunur. Sakinlər qeyd edirlər ki, giriş qapılarının qarşısı keçilməz vəziyyətə düşdüyü üçün bəzi ailələr öz imkanları hesabına taxtadan müvəqqəti körpülər düzəltməyə məcbur qalıb.
Onların sözlərinə görə, məsələ ilə bağlı dəfələrlə aidiyyəti qurumlara müraciət edilsə də, əraziyə baxış keçirən olmayıb və işlər aylardır yubadılır.
Sakinlər problemin qısa zamanda həll olunmasını, küçənin bərpa edilməsini və kanalizasiya sisteminin tam şəkildə istifadəyə verilməsini tələb edirlər.
