Xəbər verdiyimiz kimi, Gəncə şəhərində küçədə heyvana qarşı qeyri-insani rəftarla bağlı iddialar irəli sürülüb. Heyvansevər fəallar tərəfindən şəhər ərazisində balaca itin qəfəsdə saxlanıldığı, həmçinin qışın soyuq şəraitində ac və susuz vəziyyətdə olduğu iddia edilən görüntülər videoya çəkilərək sosial şəbəkələrdə paylaşılıb. Sözügedən kadrlar geniş ictimaiyyət tərəfindən sərt şəkildə tənqid olunub.
Məsələ ilə bağlı Gencexeber.az-a müraciət edən itin sahibi Rauf İsayev bildirib ki, ev heyvanını baytarlıq baxışı və qulluq göstərilməsi üçün özü ilə aparıb. Onun sözlərinə görə, prosedurlar başa çatdıqdan sonra qısa müddətlik alış-veriş etmək üçün mağazaya daxil olmaq istəyib. Lakin mağaza əməkdaşları tərəfindən heyvanla içəri daxil olmağın qadağan edildiyi bildirilib və yaxınlıqda yerləşən zoomağazanın sahibindən itin təxminən 20 dəqiqəlik qəfəsdə saxlanılmasına icazə istəyib.
Rauf İsayev qeyd edib ki, ev iti olduğu üçün onu avtomobildə nəzarətsiz qoymağa risk etməyib:
"İtim cəmi 55 günlükdür və çox həssasdır. Maşında tək qalmasından qorxdum. Mağazada maksimum 20 dəqiqə oldum, daha sonra zoomağazanın sahibinə təşəkkür edərək itimi evə apardım. Səhər isə müxtəlif sosial şəbəkələrdə heyvana qarşı qeyri-insani rəftarla bağlı paylaşımları görəndə şoka düşdüm. Məsələnin mahiyyəti araşdırılmadan bu cür ittihamların irəli sürülməsi anlaşılmazdır", – deyə o bildirib.
Hadisənin baş verdiyi mağazanın sahibi də itin sahibinin dediklərini təsdiqləyərək, yalnız kömək etmək niyyətində olduğunu vurğulayıb. Onun sözlərinə görə, sonradan əsassız şəkildə ictimai qınağın hədəfinə çevrilib.
"Sosial şəbəkələr həyatımızın ayrılmaz hissəsidir. Bəzən faydalı olsa da, təəssüf ki, bəzi hallarda insanlar məsələnin mahiyyətini araşdırmadan paylaşım edərək tanımadıqları şəxslərə mənəvi zərər verirlər", – deyə mağaza sahibi narazılığını ifadə edib.
