Gəncədə "Nizaminin evi" kimi tanınan və illərdir baxımsız vəziyyətdə qalan tikilinin taleyi yenidən sual doğurur.
Gencexeber.az məlumat verir ki, sözügedən tikili Bala Bağman yaşayış massivində, İsmət Qayıbov küçəsi, 3-cü döngə, ev 10 ünvanında yerləşir. 1982-ci ildə "Nizami" bədii filminin çəkilişləri üçün inşa edilib.
Əhali arasında "Nizaminin evi" adı ilə tanınan məkanda filmin bir çox səhnələri lentə alınıb. Tikili 1984-cü ildə Nizami Gəncəvinin ev-muzeyi statusunu alsa da, sonrakı illərdə baxımsızlıq səbəbindən yararsız hala düşüb.
Məlum olduğu kimi, Prezident İlham Əliyevin 5 yanvar 2021-ci il tarixli Sərəncamı ilə 2021-ci il ölkədə "Nizami Gəncəvi İli" elan edilib. Eyni zamanda bəzi qurumlar Nizami Gəncəvinin anadan olmasının 880 illiyi münasibətilə həmin ildə tikilinin bərpa ediləcəyini açıqlamışdı.
Lakin üzərindən 5 il keçməsinə baxmayaraq, "Nizaminin evi"nin bərpası ilə bağlı nəzərdə tutulan işlər həyata keçirilməyib. Vaxtilə muzey kimi fəaliyyət göstərməsi planlaşdırılan və Nizami irsinin təbliği baxımından simvolik əhəmiyyət daşıyan tikili hazırda baxımsız vəziyyətdə qalmaqda davam edir.
Sakinlər və şəhər ictimaiyyəti isə Gəncənin mədəni yaddaşının bir hissəsi hesab olunan bu məkanın gələcək taleyi ilə bağlı aidiyyəti qurumların mövqeyini və real addımlarını gözləyirlər.
