Gəncədə yeni istifadəyə verilmiş Memorial Kompleksinin artıq 10 gündür işıqlandırılmadığı bildirilir.
Bu barədə Gencexeber.az-a redaksiyamıza müraciət edən şəhər sakinləri şikayətlərində deyiblər. Onların sözlərinə görə, axşam saatlarında sözügedən park ərazisi tamamilə qaranlıq olur. Bildirilir ki, yalnız kompleksin binasının girişində işıq yanır, istirahət guşəsi isə zülmət qaranlıq olur.
"Zəng edirik, deyirlər nəzarət olunur, amma 10 gündür dəyişən heç nə yoxdur. Deyirlər, işıq sərfiyyatına qənaət edilir. Amma insanlar ora təmiz hava almağa, gəzməyə çıxır. Qaranlıqda qalırıq", – şikayətçi narazılıq edib.
Oxşar vəziyyətin Gəncəçay park-bulvar kompleksi ərazisində də müşahidə olunduğu iddia edilir. Vətəndaşların sözlərinə görə, xüsusilə gecə saatlarında parkdan keçmək demək olar ki, mümkün deyil.
"Dəmir körpü tərəfdən keçmək olmur. Zülmət qaranlıqdır, itlər hürür. Dünən körpü ətrafında 10-15 sahibsiz it var idi. Qorxudan geri qayıdıb Dram Teatrı tərəfdən keçməli oldum. Qadınlar, uşaqlar keçir. Bu çox təhlükəlidir", – Gəncə sakini bildirib.
Vətəndaşlar qeyd edirlər ki, artıq xeyli müddətdir park bu vəziyyətdədir və aidiyyəti qurumların məsələni nəzarətə götürməsi vacibdir.
