Gəncə şəhərində yerləşən 38 saylı Hərbi şəhərcik ərazisində yolların uzun müddətdir yararsız vəziyyətdə qalması sakinlər üçün ciddi çətinliklər yaradır.
Gencexeber.az məlumat verir ki, mövcud yol infrastrukturu nəqliyyat vasitələrinin hərəkətini xeyli məhdudlaşdırır, xüsusilə yağışlı havalarda vəziyyət daha da ağırlaşır, palçıq və çalalar səbəbindən gündəlik gediş-gəlişdə problemlər yaşanır.
Sakinlərin sözlərinə görə, avtomobillərin tez-tez sıradan çıxması, piyadaların hərəkətinin çətinləşməsi və təcili xidmətlərin əraziyə girişində gecikmələr müşahidə olunur. Bu isə həm təhlükəsizlik, həm də yaşayış komfortu baxımından ciddi narahatlıq doğurur.
Ərazi sakinləri dəfələrlə aidiyyəti qurumlara müraciət etdiklərini, lakin problemin hələ də həllini tapmadığını qeyd edirlər. Onlar 38 saylı Hərbi şəhərcikdə yolların əsaslı təmirinin nə vaxt həyata keçiriləcəyi ilə bağlı konkret tarix və aydın mövqe gözlədiklərini bildirir, məsələni gündəmdə saxlayaraq tez bir zamanda tədbir görülməsini xahiş edirlər.
Məsələ ilə bağlı redaksiyamız tərəfindən Gəncə Şəhər İcra Hakimiyyətinə (ŞİH) ünvanlanan sorğuya cavab olaraq qurumdan bildirilib ki, Gəncə şəhərinin daxili avtomobil yollarında təmir-bərpa işləri şəhərdə icra olunan "Açıq Kommunal İnfrastruktur Proqramı II" layihəsi ilə paralel şəkildə həyata keçirilir.
"Gəncə şəhərində yerləşən 38 saylı Hərbi şəhərcik ərazisində sözügedən layihə çərçivəsində nəzərdə tutulan işlər artıq başa çatdırılıb. Məlumat üçün bildirək ki, 38 saylı Hərbi şəhərciyin ərazisi Azərbaycan Respublikasının Müdafiə Nazirliyinin balansındadır.
Bununla belə, "Açıq Kommunal İnfrastruktur Proqramı II" layihəsinin icrası yekunlaşan digər ərazilərlə yanaşı, 38 saylı Hərbi şəhərciyin ərazisində yerləşən avtomobil yollarının da asfaltlanması planlaşdırılır. Bu istiqamətdə işlərin mərhələli şəkildə həyata keçirilməsi nəzərdə tutulur. Əlavə olaraq bildirək ki, ötən il Gəncə şəhər ərazisində 130-a yaxın şəhərdaxili yolda asfalt örtüyü yenilənib", – Gəncə ŞİH-dən əlavə edilib.
