Gəncənin Arzu İbrahimov küçəsində bir neçə evin sakini acınacaqlı şəraitdə yaşayırlar.
Gencexeber.az-ın məlumatına görə, "Qorodok" adlanan ərazidə yerləşən dörd ədəd ikimərtəbəli taxta evlər illər öncə rus köçkünlər tərəfindən inşa olunub. Günümüzdə isə onlar ciddi təhlükə mənbəyinə çevrilib.
Sakinlərin sözlərinə görə, həmin taxta evlər beşmərtəbəli daş binaların arasında yerləşir, çox köhnəlib və orada yanğın təhlükəsi son dərəcə yüksəkdir. Bir müddət əvvəl həmin evlərdən biri tamamilə yanaraq külə dönüb.
Sözügedən taxta evlərdə qaz təchizatı yoxdur, sakinlər soyuq aylarda məcburən ocaqlardan və elektrik qızdırıcılarından istifadə edirlər ki, bu da həm sağlamlıq, həm də təhlükəsizlik baxımından risk yaradır.
Sakinlər bildirirlər ki, dəfələrlə müvafiq qurumlara müraciət edilsə də, heç bir tədbir görülməyib. Taxta konstruksiyalı evlərin hər an çökə və ya yanğın baş verə biləcəyi ehtimalı insanları ciddi narahat edir.
"Evlər elə vəziyyətdədir ki, azacıq külək olanda belə qorxuruq. Burada qaz da yoxdur", – deyə sakinlərdən biri bildirib.
Hazırda "Qorodok" ərazisində yaşayan ailələr təhlükəsiz mənzillərlə təmin olunmaları üçün səlahiyyətli qurumlardan kömək gözləyirlər.
