Xəbər verdiyimiz kimi, ötən gün gecə saatlarından başlayaraq əsən güclü külək şəhər ərazisində bir sıra ciddi problemlərə yol açıb.
Gencexeber.az-ın məlumatına görə, küləyin təsiri ilə Gəncə şəhər 46 saylı körpələr evi-uşaq bağçasının dam örtüyü qoparaq yerə aşıb. Xoşbəxtlikdən hadisə zamanı xəsarət alan olmayıb. Bağça rəhbərliyinin operativ müdaxiləsi nəticəsində uşaqların təhlükəsizliyi təmin edilib və onlar valideynlərinə təhvil verilərək evlərinə göndəriliblər.
Oxşar hallar şəhərin Miseyib Bağırov və Xəlil bəy Xasməmmədov küçələrində də qeydə alınıb. Güclü külək nəticəsində həmin ərazilərdə beşə yaxın yaşayış evinin dam örtüyü yerə düşüb. Qışın sərt və soyuq günlərində sakinlər çətin vəziyyətlə üzləşiblər.
Bundan başqa, Lermontov küçəsində uzunluğu təxminən 12 metr olan irigövdəli ağac əyilərək avtomobil yoluna və yaxınlıqdakı yaşayış evlərinin üzərinə aşma təhlükəsi yaradıb. Bununla da sürücü, piyada və sakinlər üçün ciddi risk formalaşıb.
Eyni zamanda, Gəncə şəhər 10 nömrəli tam orta məktəbin həyətində iri ağac aşıb. Xoşbəxtlikdən burada da xəsarət alan olmayıb.
Hazırda aidiyyəti qurumların ərazilərdə baxış keçirdiyi və təhlükəli vəziyyətlərin aradan qaldırılması istiqamətində tədbirlər gördüyü bildirilir.
