Gəncədə bəzi park və istirahət məkanlarında yerləşən fəvvarələrin işləməməsi sakinlərin narazılığına səbəb olub.
Gencexeber.az-a müraciət edən şəhər sakinlərinin sözlərinə görə, xüsusilə yayın isti günlərində insanların üz tutduğu Heydər Əliyev Park-Kompleksindəki fəvvarə fəaliyyət göstərmir. Oxşar vəziyyət Şah İsmayıl Xətai prospekti ilə Zərifə Əliyeva küçəsinin kəsişməsindəki keçmiş Kəpəz Rayon İcra Hakimiyyətinin binasının qarşısında, eləcə də Gülüstan qəsəbəsindəki Qəmərli küçəsində yerləşən Əziz Əliyev adına parkda da müşahidə olunur.
Sakinlər bildirirlər ki, istirahət güşələrinin daha cəlbedici olması və insanların sərinləyə bilməsi üçün fəvvarələrin işləməsi vacibdir. Onlar aidiyyəti qurumlardan sözügedən fəvvarələrin hansı səbəbdən fəaliyyət göstərmədiyinə aydınlıq gətirilməsini və problemin aradan qaldırılmasını xahiş edirlər.
