Gəncənin Üzeyir Hacıbəyov küçəsində aparılan abadlıq və təmir işləri zamanı bəzi binaların diqqətdən kənarda qalması ilə bağlı səsləndirilən narazılıqlara münasibət açıqlanıb.
Gencexeber.az-ın sorğusuna cavab olaraq Gəncə Şəhər İcra Hakimiyyətindən bildirilib ki, sözügedən küçədə yerləşən çoxmənzilli yaşayış binalarının fasadlarının təmiri mərhələli şəkildə həyata keçirilir.
Xatırladaq ki, daha əvvəl sakinlər tərəfindən redaksiyamıza ünvanlanan şikayətlərdə yolun kənarında yerləşən binaların fasadlarının təmir edildiyi, giriş qapılarının və blok pəncərələrinin yeniləndiyi, həmin binaların qarşısına yeni asfalt örtüyünün salındığı bildirilsə də, məhəllənin daxilində yerləşən digər çoxmənzilli yaşayış binalarında analoji işlərin aparılmadığı qeyd olunurdu.
Sakinlər abadlıq işlərinin bütün binaları əhatə etməsini və məhəllədaxili ərazilərdə də təmir-bərpa işlərinin görülməsini istəyirdilər.
