Gəncədə təxminən 10 ilə yaxındır qazılan quyu ərazidə yaşayanların narahatlığına səbəb olur.
Gencexeber.az-a daxil olan şikayətlərə görə, təxminən 10 il əvvəl Rəfiqə Əliyeva küçəsində yaşayış binasının inşası məqsədilə geniş ərazidə qazıntı işləri aparılıb. Lakin tikinti davam etdirilməyib.
Sakinlər bildirirlər ki, xəndək piyadalar, xüsusilə də azyaşlı uşaqlar üçün təhlükə yaradır. Onların sözlərinə görə, indiyədək bir neçə uşaq ora yıxılaraq müxtəlif xəsarətlər alıb.
Bundan başqa, əraziyə məişət tullantıları atılır, bəzi hallarda isə həmin tullantılar yandırılır ki, bu da ətraf mühitin çirklənməsinə və antisanitar vəziyyətin yaranmasına səbəb olur.
Sakinlər qeyd edirlər ki, problemlə bağlı dəfələrlə aidiyyəti qurumlara müraciət etsələr də, indiyədək hər hansı tədbir görülməyib. Onlar ərazinin təhlükəsiz vəziyyətə gətirilməsini və problemin qısa zamanda aradan qaldırılmasını xahiş edirlər.
