Bu gün görkəmli hüquqşunas Ələddin Camal oğlu Sultanovun dünyaya gəldiyi gündür.
Gencexeber.az məlumat verir ki, Ələddin Sultanov 31 iyul 1928-ci ildə Gəncə şəhərində anadan olub. O, ilk təhsilini Gəncə şəhər 5 saylı məktəbdə alıb. Sultanov 1947-1952-ci illərdə indiki Bakı Dövlət Universitetinin hüquq fakültəsində oxuyub. O, həmin təhsil müəssisəsinin hüquq fakültəsinin ilk məzunlarından biri olub.
Sultanov 1967-1970-ci illərdə Mingəçevir şəhər prokuroru işləyib. 1970-1977-ci illərdə o, Lənkəran rayon prokuroru vəzifəsində çalışıb. Ələddin Sultanov 1977-ci ilin martında Bakının ən böyük rayonunun - Lenin (indiki Sabunçu rayonu) rayonunun prokuroru vəzifəsinə təyin edilib.
Ələddin Sultanov 1979-cu ildə Bakı şəhər prokurorunun müavini - istintaq şöbəsinin rəisi vəzifəsini icra edib. O, 1980-cı ildə Bakı şəhər prokuroru vəzifəsinə təyin edilib. 1980-ci ilin iyulundаn Sultanov Naxçıvan MSSR prokuroru işləməyə başlayıb. 1981-1987-ci illərdə o, Azərbaycan SSR prokurorunun birinci müavini kimi çalışıb. Lakin Sultanov 1987-ci ildə sovet hökumətinin qərarına görə, vəzifəsi aşağı salınaraq, Bakı şəhər prokurorluğunun İstintaq şöbəsinə prokuror vəzifəsinə təyin edilib. Onun barəsində görülmüş əsassız tədbirlə razılaşmayaraq, Sultanov tutduğu vəzifəsindən azad edilməsi ilə bağlı ərizə verib və ərizəsi təmin edilərək, o, prokurorluq orqanlarından xaric olunub.
1987-1992-cü illərdə Ələddin Sultanov Azərbaycan Respublikası Ədliyyə Nazirliyi nəzdində Xəlilbəy Xasməmmədov adına Hüquq Kadrlarının Təkmilləşdirilməsi İnstitutunun prorektoru vəzifəsində, həmin vaxtdan 1998-ci ilin iyul ayına qədər isə Bakı şəhər İcra Hakimiyyətinin Aparat rəhbəri vəzifəsində işləyib. 1998-ci ildə Milli Məclisin qərarı ilə Ələddin Sultanov Azərbaycan Respublikası Konstitusiya Məhkəməsinin ilk altı hakimindən biri təyin edilib.
Ələddin Sultanov Lənkəran rayon prokuroru vəzifəsində işləyərkən, 1972-ci ildə çəkilən "Xatirələr sahili" bədii filmində prokuror obrazını canlandırıb.
Sultanov ömrünün 70-ə yaxın ilini hüquqşünaslıq elminə həsr edib. Həmin illər ərzində o, "Xalqlar Dostluğu", "Şöhrət" ordenləri və "Tərəqqi" medalı ilə təltif olunub.
Ələddin Sultanov 31 mart 2020-ci ildə vəfat edib.
