Gəncədə qadın itlərin hücumuna məruz qalıb.
Gencexeber.az-ın məlumatına görə, Gəncə şəhərində növbəti təhlükəli hadisə baş verib. Akademik Mikayıl Hüseynov küçəsində (keçmiş Konstantin Uşinski küçəsi) gənc xanım sahibsiz itlərin hücumuna məruz qalıb.
Şahidlərin sözlərinə görə, 20-yə yaxın it qadını mühasirəyə alaraq yerə yıxıb. Hadisə zamanı zərərçəkən baş nahiyəsindən xəsarət alıb. Qəfil hücum səbəbindən güclü qorxu hissi keçirən qadın psixoloji sarsıntı yaşayıb.
Hadisə yerinə çağırılan təcili tibbi yardım briqadası zərərçəkənə ilkin tibbi yardım göstərdikdən sonra onu xəstəxanaya çatdırıb. Hazırda qadın həkim nəzarətindədir.
Qeyd edək ki, şəhər ərazisində sahibsiz itlərin yaratdığı təhlükə sakinlər arasında ciddi narahatlıq doğurur və bu kimi hallar son vaxtlar daha tez-tez qeydə alınır.
