Gəncənin Sadıllı qəsəbəsində yerləşən Hərbi Hospitalın qarşısında hər güclü yağışdan sonra eyni problem təkrarlanır.
Gencexeber.az-a sakinlər tərəfindən daxil olan şikayətlərə görə, Ömər Faiq küçəsində çirkab sularının nəqli üçün nəzərdə tutulan kanal mütəmadi olaraq daşır və ərazi yararsız vəziyyətə düşür. Bildirilir ki, bərənin içinə müxtəlif ərazilərdən məişət tullantıları atıldığı üçün suyun axınına süni maneələr yaranır.
Nəticədə yağıntılar zamanı kanal daşır, çirkab suları küçəni basır, məişət və digər tullantılar isə yolun hərəkət hissəsinə yayılır. Bu vəziyyət həm antisanitar şərait yaradır, həm də ərazidə yaşayan sakinlərin gündəlik hərəkətinə ciddi çətinlik törədir.
Sakinlər bildirirlər ki, məsələ ilə bağlı dəfələrlə aidiyyəti qurumlara müraciət etsələr də, problem aradan qaldırılmayıb və hər yağışdan sonra eyni mənzərə təkrarlanır.
Onlar kanalın təmizlənməsini və problemin köklü şəkildə həll olunmasını aidiyyəti qurumlardan xahiş edirlər.
