Gəncə şəhərinin Gülüstan qəsəbəsində, Xədicə Qayıbova küçəsində kanalizasiya xəttində baş verən partlayış sakinlər üçün ciddi narahatlıq yaradıb.
Sakinlərin Gencexeber.az-a verdiyi məlumata görə, qəfil baş verən hadisə nəticəsində çirkab suları bir neçə evin giriş qapılarını basıb. Nəticədə ərazidə hərəkət çətinləşib, kəskin üfunət qoxusu yayılıb və antisanitar vəziyyət yaranıb.
Məlumata görə, vətəndaşlar dəfələrlə aidiyyəti qurumlara şikayət etmələrinə baxmayaraq əraziyə baxış keçirilməyib, problem isə hələ də aradan qaldırılmayıb.
Sakinlər bildirirlər ki, bu hal təkcə məişət çətinliyi deyil, sağlamlıq üçün də real təhlükədir və məsələ təxirəsalınmadan həll olunmalıdır. Onlar kanalizasiya xəttinin bərpasını, ərazinin təmizlənməsini və dezinfeksiya işlərinin aparılmasını tələb edirlər.
