Gəncə şəhərində bəzi dövlət qurumlarının ətrafında nizamsız parklanma yol hərəkətini faktiki olaraq iflic vəziyyətə salır.
Gencexeber.az-a daxil olan şikayətlərə əsasən, Fikrət Əmirov küçəsində Azərbaycan Yerüstü Nəqliyyat Agentliyinin (AYNA) Gəncə regional şöbəsinin qarşısında quruma və əməkdaşlarına məxsus avtomobillər yolun hərəkət hissəsini tam şəkildə zəbt edib. Avtomobil nəqliyyatı sahəsində tənzimləmə və nəzarətə cavabdeh olan bir qurumun qarşısında bu mənzərənin müşahidə olunması cəmiyyətdə haqlı suallar doğurur.
Uzun məsafə boyunca hərəkət hissəsində saxlanılan avtomobillər süni tıxaclar yaradır, qarşıdan gələn nəqliyyatla toqquşma riskini dəfələrlə artırır. Bu vəziyyət təkcə narahatlıq deyil, birbaşa qəza təhlükəsidir. Baş verə biləcək hadisələrə görə məsuliyyət daşıyan tərəf isə indidən bəllidir.
Eyni hal Aida İmanquliyeva küçəsində (köhnə Muxtar Hacıyev küçəsi) də müşahidə edilir. Buradan Atatürk prospektinə çıxış ciddi şəkildə çətinləşib. Sözügedən ərazidə Gəncə–Daşkəsən Regional Təhsil İdarəsi əməkdaşlarına məxsus avtomobillər yolun hər iki tərəfində park edilir.
Qurumun qarşısında digər sürücülərin təhlükəsizliyi faktiki olaraq görməzdən gəlinir. Nəticədə Gəncə sakinləri ya yaranan tıxacda qalmalı, ya da həyatlarını riskə ataraq əks zolağa çıxmağa məcbur olurlar.
Şikayətçilərin sözlərinə görə, problem uzun müddətdir mövcuddur, lakin aidiyyəti qurumlar tərəfindən real tədbir görülmür. Qeyd olunur ki, hər iki ərazidə parklanma qadağan edilməli, yol hərəkətinin təhlükəsizliyi təmin olunmalıdır.
