Gəncədə yaşayış binalarından birində antisanitar vəziyyət hökm sürür.
Gencexeber.az-a verilən məlumata görə, söhbət şəhərin Atatürk prospekti, ev 265 ünvanında yerləşən, sakinlər arasında "Vəkillər binası" kimi tanınan tikilidən gedir. Bildirilir ki, binanın bloklarında üfunətdən dayanmaq mümkün deyil.
Sakinlərin sözlərinə görə, buna səbəb kanalizasiya borularının partlamasıdır. Problem uzun müddətdir davam edir. Nəticədə çirkab suları binanın zirzəmisinə axır və ərazidə kəskin qoxu yaranır. Bildirilir ki, zirzəmiyə enmək belə mümkün deyil.
Vətəndaşların sözlərinə görə, aidiyyəti qurumlara dəfələrlə müraciət edilsə də, problem hələ də köklü şəkildə aradan qaldırılmayıb. Bu vəziyyət isə bina sakinlərinin gündəlik həyatında ciddi narahatlıq yaradır.
