Gəncə şəhər Ekoloji Park Kompleksi ərazisində yerləşən botanika bağının baxımsız vəziyyətdə olduğu bildirilir.
Gencexeber.az-a daxil olan çoxsaylı şikayətlərə görə, Gəncə SOS Uşaq Kəndinin arxa hissəsində yerləşən ərazi uzun müddətdir nəzarətsiz qalıb. Vətəndaşların sözlərinə görə, bağın yalnız bəzi hissələrində müəyyən təmizlik işləri aparılsa da, ümumi vəziyyət ürəkaçan deyil.
Ərazidə ağacların yerləşdiyi hissədə quraşdırılmış oturacaqların çirkli və baxımsız olduğu qeyd edilir. Həmçinin vaxtilə dekorativ məqsədlə əkilmiş lavanda kollarının susuzluq və qulluq edilməməsi səbəbindən tamamilə məhv olduğu iddia olunur.
Sakinlər bildirirlər ki, sözügedən məkan şəhər əhalisinin istirahəti üçün nəzərdə tutulsa da, hazırkı vəziyyət həm estetik görünüşə, həm də insanların rahatlığına mənfi təsir göstərir.
Vətəndaşlar aidiyyəti qurumlardan botanika bağının yenidən abadlaşdırılmasını, ərazidə mütəmadi təmizlik və yaşıllaşdırma işlərinin aparılmasını xahiş edirlər.
