İndiki Gəncəçay park-bulvar kompleksi yaxınlığından köçürülən sakinlər illərdir çıxılmaz vəziyyətdə qalıb.
Gencexeber.az-a sözügedən məsələ ilə bağlı şikayətlərini ünvanlayan sakinlər bildiriblər ki, onlar Gəncə çayının yaxınlığından illər öncə köçürüldükdən sonra ciddi sosial problemlərlə üz-üzədir. Onlar "Çəngəl-Bıçaq", "Xaraba Yeri" və başqa adlarla tanınan əraziyə köçürülüblər.
Köçürülmə zamanı sakinlərə yeni evlərdə bütün infrastrukturun təmin ediləcəyi vəd edilsə də, vəziyyət tam əksinə olub. Tikililərdə dərin çatlar əmələ gəlib, evlərin hasarları isə ümumiyyətlə tikilməyib. Sakinlər öz hesablarına müəyyən abadlıq işləri görsələr də, əsas problemlər hələ də qalır.
Ən ciddi narazılıq evlərə çıxarışların verilməməsidir. Vətəndaşlar illərdir rəsmi sənəd ala bilmədikləri üçün nə evlərini sata, nə də təmir üçün dövlət dəstəyi əldə edə bilirlər.
Sakinlər bildirir ki, köçürülmə zamanı onlara "tam infrastrukturlu yaşayış məhəlləsi" vəd edilib. Lakin indi ərazidə nə su, nə kanalizasiya sistemi, nə də normal yol mövcuddur. Onlar dəfələrlə aidiyyəti qurumlara müraciət etsələr də, heç bir nəticə əldə edilməyib.
Redaksiyamız sakinlərin şikayətlərini Gəncə Şəhər İcra Hakimiyyətinə də çatdırıb. Qurumun nümayəndələri bildiriblər ki, məsələ ilə bağlı rəsmi açıqlama veriləcək. Lakin saatlarla gözləməyimizə baxmayaraq, İcra Hakimiyyətindən heç bir açıqlama təqdim edilməyib.
