Gəncə şəhərinin Mehdi Hüseynzadə küçəsində, 22 nömrəli uşaq bağçasının qarşısında yerləşən ərazinin bərbad vəziyyətdə olduğu bildirilir.
Gencexeber.az-a müraciət edən sakinlərin iddialarına görə, problem ötən ildən bəri davam edir. Onlar bildirirlər ki, yağışlı havalarda kanalizasiya xətləri daşır, nəticədə çirkab suları küçəyə axır və ərazidə kəskin üfunət iyi yaranır.
Vətəndaşların sözlərinə görə, mövcud vəziyyət ərazidə yaşayan sakinlər üçün ciddi narahatlıq yaradır.
Sakinlər qeyd edirlər ki, məsələ ilə bağlı dəfələrlə aidiyyəti qurumlara müraciət etsələr də, indiyədək problemin həlli istiqamətində heç bir nəticə əldə olunmayıb.
Onlar aidiyyəti qurumlardan kanalizasiya probleminin aradan qaldırılmasını və ərazidə təxirəsalınmaz təmir-bərpa işlərinin aparılmasını xahiş edirlər.
