Gəncə şəhərində sakinlərin uzun müddət narahatlıq keçirdiyi ağacla bağlı problem nəhayət həllini tapıb.
Gencexeber.az-ın məlumatına görə, Zərrabi küçəsi, 218 nömrəli binanın qarşısında qəzalı vəziyyətdə olan ağac bu gün budanıb. Mənzil Kommunal Təsərrüfatı İstehsalat Birliyinin Yaşıllaşdırma şöbəsinin əməkdaşları və texnikası əraziyə cəlb olunaraq təhlükə yaradan hissələri kəsiblər.
Uzunluğu təxminən 15 metr olan ağacın budanması nəticəsində bina sakinlərinin təhlükəsizliyi təmin edilib.
Qeyd edək ki, sözügedən ağac ötən ilin oktyabr ayında baş vermiş güclü külək nəticəsində əyilmişdi. Sakinlərin dəfələrlə aidiyyəti qurumlara müraciət etməsinə baxmayaraq, uzun müddət heç bir tədbir görülməmişdi. Məsələ redaksiyamız tərəfindən ictimai müstəviyə çıxarıldıqdan sonra müvafiq addımlar atılıb və problem aradan qaldırılıb.
