Gəncədə binanın blokları qəzalı vəziyyətdədir.
Gencexeber.az məlumat verir ki, Adilxan Ziyadxanov küçəsində yerləşən 36-cı binanın blok girişlərindəki yağışdan və qardan qorunmaq üçün nəzərdə tutulmuş qoruyucu beton konstruksiya qəzalı vəziyyətdədir.
Sözügedən məsələ ilə bağlı redaksiyamıza şikayətlərini bildirən sakinlərin sözlərinə görə, bu hal getdikcə daha təhlükəli xarakter alır: beton hissələr qoparaq sakinlərin başına tökülür. Təqdim etdiyimiz fotolarda konstruksiyanın daxilindəki armaturların üzə çıxdığı müşahidə edilir.
Vətəndaşlar iddia edirlər ki, 36-cı binanın fasadının qəzalı olması haqda son bir neçə il ərzində Gəncə Şəhər İcra Hakimiyyətinə müraciət ediblər. Dəfələrlə ünvanlanan şikayətlərə baxmayaraq, təhlükə saçan konstruksiyaların təmiri üçün zəruri addımlar atılmayıb.
