Gəncədə gecə saatlarından başlayan güclü külək şəhərin müxtəlif ərazilərində ciddi fəsadlara yol açıb.
Gencexeber.az-ın məlumatına görə, qeyri-sabit hava şəraiti nəticəsində şəhərin Şah İsmayıl Xətai, Heydər Əliyev və Atatürk prospektlərində, Mirzə Abbas Abbaszadə və Dədə Qorqud küçələrində, Totanlı dairəsi və "DOS-102" adlanan ərazilərdə, eləcə də 3-cü və 4-cü mikrorayonlarda, Füzuli və Nəriman Nərimanov parklarında iri gövdəli ağaclar qırılaraq aşıb.
Totanlı dairəsi ərazisində ağaclardan biri meyvə-tərəvəz mağazasının üzərinə düşüb. Xoşbəxtlikdən hadisə zamanı xəsarət alan olmayıb.
Bundan başqa, Şah İsmayıl Xətai prospekti 564 ünvanında yerləşən, köhnə "Azərişıq"ın qarşısındakı çoxmənzilli binanın dam örtüyü uçub.
Köhnə maşın bazarının qarşısında, Sədi küçəsində ağac yüksək gərginlikli elektrik xətti üzərnə düşərək onu zədələyib. 5-ci mikrorayon ərazisində isə aşan ağac yolun hərəkət hissəsini qismən bağlayaraq nəqliyyatın hərəkətində çətinlik yaradıb. Dədə Qorqud küçəsi ilə Şah İsmayıl Xətai prospektinin kəsişməsində külək dekorativ güllərə ciddi ziyan vurub.
Məhsəti qəsəbəsində yerləşən yaşayış evinin hasarı uçaraq qaz xəttini sıradan çıxarıb. 200 yaxın sakinin yaşadığı evlərin qaz təchizatı dayandırılıb.
Eyni zamanda, bəzi ərazilərdə elektrik enerjisinin verilməsində fasilələr qeydə alınıb.
Bildirək ki, hazırda qərb bölgəsində güclü külək davam edir.
