Gəncədə XV "İpək Yolu" Beynəlxalq Musiqi Festivalının təntənəli bağlanış mərasimi keçirilib.
Gencexeber.az məlumat verir ki, tədbir Gəncə Şəhər İcra Hakimiyyətinin və Mədəniyyət Nazirliyinin dəstəyi, Azərbaycan Bəstəkarlar İttifaqı və Fikrət Əmirov adına Gəncə Dövlət Filarmoniyasının birgə təşkilatçılığı baş tutub. Mərasimdə şəhər İcra Hakimiyyətinin başçısı Niyazi Bayramovla yanaşı Türkiyənin Gəncədəki Baş konsulu Recep Öztop, eləcə də bir çox xarici və yerli təşkilat və qurumların nümayəndələri iştirak edib.
Festivalın bədii proqramında Azərbaycan, Türkiyə və Qırğızıstanın musiqi və rəqs kollektivləri çıxış ediblər. Qırğızıstan Respublikasının Bişkek şəhərində fəaliyyət göstərən "Seytek" Milli Uşaq və Gənclər Mərkəzinin "Ak-Niyyət" Xalq Xoreoqrafiya Ansamblının, Türkiyənin Trabzon Böyükşəhər Bələdiyyəsinin Xalq Rəqsləri Ansamblının, F.Əmirov adına Gəncə Dövlət Filarmoniyasının "Göygöl" Dövlət Mahnı və Rəqs Ansamblının, Estrada Ansamblının və "Xəmsə" ritm qrupunun çıxışları tamaşaçılar tərəfindən alqışlarla qarşılanıb.
Çıxışlardan sonra tərəflər arasında xatirə hədiyyələri təqdim olunub.
XV "İpək Yolu" Beynəlxalq Musiqi Festivalının bağlanış mərasimindən sonra konsert proqramını izləməyə gələn Quru Qoşunlarının şəxsi heyəti üçün Fikrət Əmirov adına Gəncə Dövlət Filarmoniyası tərəfindən çay süfrəsi təşkil olunub. Əsgərlərlə səmimi söhbət edən Gəncə Şəhər İcra Hakimiyyətinin başçısı Niyazi Bayramov ötən gün doğum gününü qeyd edən hərbi qulluqçunu təbrik edərək ona xatirə hədiyyəsi təqdim edib.
