Gəncənin müxtəlif ərazilərində minik avtomobilləri avtobus dayanacaqlarında park edilir.
Gencexeber.az-a daxil olan çoxsaylı şikayətlərə görə, bu hal şəhərin demək olar ki, əksər istiqamətində müşahidə olunur. Nəticədə avtobuslar dayanacağa tam yaxınlaşa bilmir, sərnişinlər isə nəqliyyat vasitəsinə yolun hərəkət hissəsində minib-düşməli olurlar. Bu isə həm tıxac, həm də təhlükəli vəziyyət yaradır.
Məlum olduğu kimi, ötən ilin sentyabr ayından Gəncədə "BakuBus" MMC fəaliyyətə başlayıb. İstismara verilən müasir və komfortlu avtobuslar əvvəlki nəqliyyat vasitələrindən daha uzun olduğuna görə onların dayanacaqlara rahat daxil olması üçün digər hərəkət iştirakçılarının məsuliyyəti daha da artır.
Sakinlər bildirirlər ki, avtobus dayanacaqlarının minik avtomobilləri tərəfindən zəbt edilməsi ictimai nəqliyyatın normal fəaliyyətinə mane olur. Onlar aidiyyəti qurumlardan bu məsələyə nəzarətin gücləndirilməsini və qayda pozuntularına qarşı tədbir görülməsini xahiş edirlər.
