Gəncədə fəaliyyət göstərən 2 nömrəli marşrut xətti üzrə hərəkət edən avtobuslarla bağlı narazılıqlar səsləndirilir.
Gencexeber.az-a şikayətlərini ünvanlayan sərnişinlərin iddiasına görə, havaların isinməsinə baxmayaraq, marşrut avtobuslarının əksəriyyətində kondisioner sistemləri işləmir. "Azər-Avtonəqliyyat" ASC-yə məxsus olduğu bildirilən avtobuslarda kondisioner sisteminin işləməsini təmin edən relelərin qəsdən ayrıldığı iddia olunur. Məlumata əsasən, bunun yanacaq sərfiyyatını azaltmaq məqsədilə edildiyi bildirilir.
Vətəndaşların sözlərinə görə, son günlər havanın temperaturu 30 dərəcəni keçdiyi halda, avtobuslarda sərinləndirmə sistemləri işə salınmır. Onlar hesab edirlər ki, ictimai nəqliyyatda gedişhaqqının artırılmasına baxmayaraq, xidmət səviyyəsində ciddi dəyişiklik müşahidə olunmur.
Qeyd edək ki, səsləndirilən iddialarla bağlı "Azər-Avtonəqliyyat" ASC ilə əlaqə saxlamaq cəhdlərimiz uğursuz alınıb. Qarşı tərəfin mövqeyini dərc etməyə hazırıq.
