Sosial şəbəkələrdə Gəncədə "BakuBus" MMC-yə məxsus 16 nömrəli marşrut xətti ilə hərəkət edən avtobusda baş verən xoşagəlməz hadisənin görüntüləri yayılıb.
Gencexeber.az-a hadisə şahidləri tərəfindən bildirilib ki, yayılan kadrlarda sərnişinlər və nəqliyyat vasitəsinin sürücüsü arasında gərginlik yaşandığı əks olunub. Bildirilib ki, hadisədən öncə avtobusa daxil olan qazi validator vasitəsilə ödəniş etmək əvəzinə veteranlıq vəsiqəsini müşahidə kamerasına göstərib. Sürücü isə sənədin ona təqdim olunmasını xahiş etdikdən sonra tərəflər arasında mübahisə yaranıb.
Yüksək ton və qarşılıqlı narazılıq şəraitində davam edən mübahisə nəticəsində sürücü avtobusun qapılarını bağlayaraq nəqliyyat vasitəsini tərk edib. Bildirilir ki, o, aidiyyəti qurumlara baş verənlər barədə məlumat verərək uzun müddət yoluna davam etməyib.
Bu hal sərnişinlərin narazılığına səbəb olub. İddialara görə, avtobusda olan şəxslər uzun gözləmədən narahat olduqlarını bildirib, hətta sərnişinlərdən biri pəncərədən düşərək nəqliyyat vasitəsini tərk etməyə məcbur qalıb.
