Gəncədə 72 ailənin yaşadığı çoxmənzilli bina aylardır kanalizasiya problemi ilə üz-üzədir.
Gencexeber.az-a daxil olan məlumata görə, söhbət şəhərin Zərifə Əliyeva küçəsi, 5 ünvanında (keçmiş Vəli Xuluflu küçəsi), "İmperial Garden" şadlıq sarayının qarşısında yerləşən binadan gedir.
Bildirilir ki, bir neçə aydır kanalizasiya suları fasiləsiz şəkildə binanın zirzəmisinə axır. Nəticədə zirzəmi çirkab suları ilə dolub, bloklarda isə kəskin üfunət yaranıb.
Sakinlərin sözlərinə görə, çirkab sularının uzun müddət zirzəmidə qalması binanın özülü üçün də ciddi təhlükə yaradır. Onların fikrincə, bu vəziyyət binanın dayanıqlılığına mənfi təsir göstərə bilər.
Məsələ ilə bağlı aidiyyəti qurumlara müraciət edildiyi bildirilib. İddiaya görə, su təsərrüfatı xidmətinin əməkdaşı zirzəmiyə girişin mümkün olmadığını əsas gətirərək nasazlığı aradan qaldıra bilməyib və bunun üçün giriş hissəsində açılış və ya qazıntı işlərinin aparılmasının zəruri olduğunu qeyd edib. Yerli Mənzil-Kommunal Təsərrüfatı Sahəsi tərəfindən isə binanın konstruksiyasına müdaxilə edilməsinin onların səlahiyyətinə aid olmadığı bildirilib.
