Gəncədə vətəndaş ev alqı-satqısı zamanı aldadıldığını iddia edir.
Gencexeber.az məlumat verir ki, Gəncə sakini Kəsra Aslan qızı Əliyeva Zaur adlı maklerin qurduğu tələnin qurbanı olduğunu bildirir.
Onun iddiasına görə, təxminən 6 ay əvvəl Zaur adlı makler ailəsinin etimadını qazanaraq gecə saatlarında onun qohumlarına ev göstərib və tikilinin alınmasına razılıq alıb. İddiaçının sözlərinə görə, növbəti gün çıxarışı olmayan evi 29 min manata alıb. Bu məbləğin 1000 manatı isə makler xidməti haqqı kimi Zaur adlı şəxsə ödənilib. Bildirilib ki, tikili notarial qaydada 50 illik etibarnamə əsasında rəsmiləşdirilib.
Qadının iddiasına görə, evi aldıqdan bir neçə gün sonra tikilidə ciddi problemlər üzə çıxıb. Mişar və çay daşları ilə hörülən evin bir hissəsinin dağıldığı, ümumilikdə isə qəzalı vəziyyətdə olduğu qeyd edilir.
Kəsra Əliyeva hazırda maklerin onun telefon nömrəsini qara siyahıya saldığını, ünsiyyətdən yayındığını və məsələ ilə bağlı hər hansı izahat vermədiyini iddia edir.
