Gəncənin Sadıllı qəsəbəsinin indiki Xəqani küçəsində, DOS-84 adlanan ərazidən keçən su kanalının vəziyyəti 24 il əvvəl necə idisə, bu gün də demək olar ki, dəyişməyib. Bununla bağlı sosial şəbəkələrdə görüntülər yayılıb.
Gencexeber.az-ın məlumatına görə, Samux Sukanal İdarəsinin balansında olan bərə uzun illərdir müxtəlif tullantıların atıldığı əraziyə çevrilib. Nəticədə məcrada toplanan çirkab suları kanaldan kənara çıxaraq ətraf ərazilərə yayılır.
Ərazidə Gəncə Şəhər Mənzil Kommunal Təsərrüfatı İstehsalat Birliyinin texnikaları və əməkdaşları tərəfindən mütəmadi olaraq təmizlik işləri aparılsa da, problemin köklü şəkildə həllinə nail olmaq mümkün olmur.
Mövcud mənzərə həm sanitar baxımdan narahatlıq doğurur, həm də ərazinin görünüşünə mənfi təsir göstərir.
Görünən odur ki, sözügedən kanal Gəncədə illərdir həlli gözlənilən və şəhərin ümumi simasında "yamaq" kimi qalan problemlərdən biri olaraq hələ də öz həllini tapmayıb.
