Gəncə şəhərinin Puşkin küçəsində yerləşən, yaşı təxminən 200 ilə çatan bir neçə yaşayış evi qəzalı vəziyyətə düşüb.
Gencexeber.az-a müraciət edən Puşkin küçəsi 55/1 ünvanında yaşayan Rövşən Seyidov bildirib ki, mayın 22-də yağan intensiv yağışlardan sonra ərazidəki bir neçə ev ciddi zərər görüb. Qonşu evin bir hissəsinin uçması nəticəsində onun yaşadığı tikili də yararsız vəziyyətə düşüb.
Sakinin sözlərinə görə, iyunun 17-də qonşu evin daha bir hissəsi uçub. Nəticədə ona məxsus evin mətbəx hissəsi tamamilə dağılıb. Təhlükəsizlik səbəbindən ailəsi ilə birlikdə evi tərk edən Seyidov hazırda qohumlarının evinə sığınıb.
Rövşən Seyidovun iddiasına görə, o, iki dəfə Gəncə Şəhər İcra Hakimiyyətinə müraciət edib. Lakin hələ də texniki ekspertiza aparılmayıb və ona rəsmi cavab verilməyib. Bu müddətdə yağan yağışlar səbəbindən isə tikilinin vəziyyəti daha da ağırlaşıb, divarlardakı çatlar genişlənib, dam örtüyü zədələnib.
Sakin evin texniki ekspertizadan keçirilməsini, qəzalı vəziyyətdə olduğunun rəsmi qaydada müəyyən edilməsini, həmçinin ailəsinin müvəqqəti yaşayış yeri və ya maddi kompensasiya ilə təmin olunmasını xahiş edir.
Qeyd edək ki, məsələ ilə bağlı Gencexeber.az tərəfindən Gəncə Şəhər İcra Hakimiyyətinə sorğu ünvanlanıb.
