Gəncə şəhəri 46 saylı körpələr evi–uşaq bağçasında istilik sistemi ilə bağlı yaranmış nasazlıq artıq bir aydır davam edir və məsələ hələ də öz həllini tapmayıb.
Gencexeber.az-a daxil olan çoxsaylı şikayətlərdə qeyd edilir ki, bağçada noyabrın 15-dən – istilik mövsümünün başlandığı ilk gündən etibarən otaqlar lazımi temperatura qədər isidilmir. Məlumata görə, problem müəssisənin kombi sistemində yaranmış texniki nasazlıqla əlaqədardır.
Soyuq hava şəraiti səbəbindən dərs prosesində çətinliklər yaşanır. Dəyələr və tərbiyəçilər uşaqları soyuqdan qorumaq üçün onları daha qalın geyindirməyə məcbur olur. Nəticədə aktiv hərəkət edən azyaşlılar tez-tez tərləyərək xəstələnirlər. Bu isə valideynlər arasında ciddi narahatlıq yaradıb.
150-dən çox uşağın tədris aldığı bağçanın rəhbərliyi problemin aradan qaldırılması üçün dəfələrlə aidiyyəti qurumlara, o cümlədən Gəncə-Daşkəsən Regional Təhsil İdarəsinə müraciət etsə də, müsbət nəticə əldə olunmayıb.
Bağçanın otaqlarının soyuq olması isə həm uşaqların sağlamlığı, həm də tədris prosesinin keyfiyyəti baxımından ciddi təhlükə yaradır. Valideynlər və müəssisə kollektivi problemin təxirə salınmadan həllini tələb edirlər.
