Gəncənin Mahrasa bağı adlanan yaşayış massivinin sakinləri yol örtüyünün təmirindən sonra ərazidə təhlükəli vəziyyət yarandığını iddia edirlər.
Gencexeber.az-a daxil olan çoxsaylı şikayətlərdə bildirilib ki, Gəncə şəhər 15 saylı körpələr evi–uşaq bağçasının qarşısında, Şota Rustaveli küçəsində tez-tez yol-nəqliyyat hadisələri baş verir.
Sakinlərin sözlərinə görə, kiçik küçələrlə kəsişən hissələrdə "Yol ver" və "Piyada keçidi" nişanları quraşdırılsa da, bu, ərazidə böyüklərin və azyaşlı piyadaların təhlükəsiz hərəkətini tam təmin etmir.
İddialara əsasən, bir müddət əvvəl küçəyə yeni asfalt örtüyünün çəkilməsindən sonra bəzi sürücülər sürət həddini aşmağa başlayıblar. Bildirilir ki, nəqliyyat vasitələri enişli döngəyə sürəti azaltmadan daxil olur, ikinci dərəcəli yollarla hərəkət edən bəzi sürücülər isə kəsişmələrdə "Yol ver" nişanının tələbini kobud şəkildə pozaraq əsas yola çıxırlar. Nəticədə həmin ərazidə qəza riskinin artdığı qeyd olunur.
Sakinlər aidiyyəti qurumlardan sözügedən ərazidə təhlükəsizlik tədbirlərinin gücləndirilməsini, xüsusilə də sürətin məhdudlaşdırılması üçün əlavə vasitələrin tətbiqini xahiş edirlər.
