Gəncədə məktəbin binasında iri çatlar yaranıb.
Gencexeber.az-a daxil olan şikayətlərə görə, şəhərin Gülüstan qəsəbəsində yerləşən Vaqif Əliyev adına 12 nömrəli tam orta məktəbin binasının daxili və xarici hissələrində iri çatların əmələ gəldiyi bildirilir.
Valideynlərin sözlərinə görə, tikili qəzalı vəziyyətə düşmə təhlükəsi ilə üzləşib. Bununla yanaşı, təhsil ocağının dam örtüyünün də qəzalı vəziyyətdə olduğu vurğulanır.
Onlar iddia edirlər ki, məsələ ilə bağlı dəfələrlə aidiyyəti qurumlara müraciət olunsa da, problem hələ də həllini tapmayıb. Məktəb binasına isə Fövqəladə Hallar Nazirliyinin nümayəndələri baxış keçiriblər.
Vətəndaşlar xüsusilə güclü küləkli hava şəraitində dam örtüyünün qoparaq aşması ehtimalından narahatlıq ifadə ediblər. Onların sözlərinə görə, bu vəziyyət məktəbdə təhsil alan şagirdlər və orada çalışan müəllimlər üçün ciddi təhlükə yaradır.
