Gəncə şəhərindən keçən Gəncəçayın məcrası ciddi şəkildə zibillənir.
Gencexeber.az-ın əldə etdiyi məlumata görə, çayın təbii axarı inşaat tullantıları ilə çirkləndirilir. Bu isə təkcə ekoloji tarazlığa deyil, eyni zamanda şəhərin ümumi görünüşünə və əhalinin sağlamlığına birbaşa təhlükə yaradır.
Təqdim etdiyimiz videogörüntü Gəncəçayın Şəmsi Bədəlbəyli küçəsindən keçən hissəsində qeydə alınıb. Kadrlardan aydın görünür ki, QAZ markalı aztutumlu yük avtomobilinin sürücüsü nəqliyyat vasitəsini çayın sahilində saxlayaraq yük bölməsindən birbaşa çayın məcrasına inşaat tullantıları atır.
Sakinlərin sözlərinə görə, bu cür məsuliyyətsiz və qanunsuz davranış təbiətə ciddi zərbə vurmaqla yanaşı, Gəncə şəhərinin simasını da korlayır. Onlar aidiyyəti qurumları məsələyə dərhal reaksiya verməyə, nəzarəti gücləndirməyə və ekoloji qaydalara əməl etməyən şəxslərin məsuliyyətə cəlb olunmasına çağırırlar.
